يا حلوة المبسم والعيون الوساع

يا كاملة بالزين ليتك تجيني

شوفك ينسيني همومي والأوجاع

يا فرحة الماضي وباقي سنيني

لا شفت زولك قلت يا مرحبا الساع

وإن غبت عني زاد شوقي وحنيني

في حبكم يا صاحبي دوم طماع

وكل الليالي في وجودك تزيني

زودٍ على حسنك بعد حلوة أطباع

وكل العرب في حبكم حاسديني

ياللي مكانك يا الغلا بين الأضلاع

ودي بشوفك ترتوي منك عيني

لا تحرمين اللي من الوجد ملتاع

وإنتي سبايب علته يا ظنيني

يا زين حبك داخل القلب ما ضاع

ما دام حبك بالهوى محتويني

في طلتك هيبه بها نور وشعاع

حتى القمر من طلتك ما يبيني

كل العيون إن شافتك غصب تنصاع

تتبع نظرها فيك لو تبعديني

يا ليت نبحر دون مرسى ولا شراع

عشان يدينك ما تفارق يديني

قصة غرامك ما بها زيف وخداع

إنتي وبس اللي ترى تسعديني